- "Ho hørte berre suset da havørna strauk over hovudet hennes, slo klørne i sjøen og løfta seg på vengane med ein sprellande laks i kloa. Julie heldt pusten, stod heilt stille og såg at livet i havet sprella mot himmelen under vengar som slo tunge tak mot eit einsamt skjer. Julie kjente berre kor ho vart sogen med i ørnedansen, ho kjente det langt inni seg, det rykte i stortåa; ho måtte opp på halvtå - relevé - ho ville flyge etter ørna over havet, over husa i det fråflytta Hortaværet som hadde kasta loss og flaut omkring på sjøen ein stad der himmel og hav møtes. Eg må bli som ørna, tenkte Julie..."
Det handlar om livet, døden, havet og kjærleiken i Torvald Sunds siste bok. Ei dramatisk historie på livet laust, samtidig som det er ein kunstnarroman. Forfattaren kombinerer desse elementa i ei vakker fortelling, som eg unnar både unge og vaksne å lesa.
Ungjenta Julie lever og andar for ballett. Runar har droppa skulen og er no fiskar med eigen sjark. Dei to ungdommane er inderleg forelska i kvarandre, og vil ikkje høyre på dei som seier kobinasjonen ballettdanserinne/fiskar er umuleg. Medan Julie øver frenetisk for å klare opptakingsprøvene til The Royal Ballet School i London, tar ho ein ettermiddag fri for å følgje kjærasten ut på havet. Dei går i land på eit lite skjer som blir borte under vatn når sjøen flør. Der rulla ein stein over eine foten til Runar, og han kjem ikkje laus, verken på eige hand eller med hjelp av Julie. Dermed er eit drama på liv og død i full gang, og spenninga berre stig og stig til eit formidabelt klimaks.
Gjennom 20 korte kapitler fordelt over 100 sider vekslar perspektivet frå Julie til Runar, via hjelpemannskapane som omsider er på veg. Omgivelser og menneskje er tydelege. Runar med snusen og den gode sjølukta - "Ho sneik seg akterut, måtte inn i styrhuset til Runar, klemme seg inntil han, snuse på saltlukta i genseren hans, kjenne pusten av snus, lukt ho aldri kjente nokon annan stad" - Julie med den sterke dansekroppen, som kan vera steinhard og kattemjuk om ein annan. Den pensjonerte fiskaren, som ikkje har vore utaskjærs på 40 år, da han såvidt kom frå det med livet under eit forlis på Finnmarkskysten.
Ein moderne Romeo og Julie som toppar seg i kapitel 19. Eit dramatisk høgdepunkt, når Runar trur at han skal døy og er viss på at Julie har svikta. Det forferdelige øyeblikket der naturkreftene er i ferd med å knekke menneske. Her viser Sund språkleg perfeksjon!
Dette er ei ungdomsbok som traff ein vaksen mann rett i solar plexus!
Sveinung H.
Lån denne boka